Jis ne Merey Sapney Loot liye

Jis ne Merey Sapney Loot liye
Meri aankhein Jis ne Cheeni Hain
Uss Shakhs ki Zahreeli baatein
Amrat hi Samajh kar Peeni Hain
Zakhmoo'n ki to koi Baat Nahi
Jazboo'n ki Qubaayein Seeni hain
Ehsaas yeh Rakhna hai Har dam
Koi Dukh na karey Nashaad Ussey
Allah Rakhey Aabaad Ussey
Ik Doosrey ke Dukh Sukh ke Amee'n
Ham jab Tak Achhey Meet Rahey
Dharti ke Mehaktey Hontoo'n Par
Chahat ke Suhaaney Geet Rahey
Jisey Yaad Karein Sab Dil Waley
Ham Aisi Anokhi Reet rahey
Ab Apney Haal pe Kya Royein
Jaise bhi Hain Yeh Din Beet Rahey
Par Uss ke liye Apni hai Dua
Har Gaam pe Us ki Jeet Rahey
Hasil ho Qad-e-Shamshaad Ussey
Allah Rakhey Abaad Ussey
Uss ne to Mujhey Radd kar hi Diya
Tha Haqq-e-Istardaad Ussey
par Marey Jigar se Nikli hui
Pohancha de Koi Faryaad Ussey
Koi Aur Ussey Majnoo Chahey
Koi Aur Miley Farhaad Ussey
Phir Aaye gi Meri Yaad Ussey
Allah Rakhey Aabaad Ussey !