Wednesday, January 5, 2011

Mishalein derd ki seenon meiN jalaaey Rakhna


Mishalein derd ki seenon meiN jalaaey Rakhna
Apney KaandhoN pe saleeboN ko uthaaey rakhna

Khak jalwoN sey na ho jaaey kaheeN toor-e Khayal
Bazm-e jaanaN meiN nazar apni Jhukaaey rakhna

Jaaney phir saqi-o mey khana mileN ya na MileN
Apni saansoN mein mehek mey ki basaaey rakhna

Rehzan-e waqt kaheeN ye bhi mataa'a loot na ley
Apney seeney meiN mera derd chupaaey rakhna

Jaaney kab lot ke aa jaaey wo bhatka raahi
Raat bher shama dareechey meiN jalaaey rakhna

Jab talak ho na tulu seena-e zulmat sey Qamar
apni palkowN pe sitaarowN ko sajaaey rakhna

No comments:

Popular Posts