Monday, July 26, 2010

Khizaan-E-Guzeeda Gulaab Hai Meri Zindagi


Khizaan-E-Guzeeda Gulaab Hai Meri Zindagi,
Meri Zindagi Ka Azaab Hai Meri Zindagi,

Na Hi Yaar Hai, Na Hi Dilruba, Na Hi Mai-Kada,
Mat Puchh Kitni Kharab Hai Meri Zindagi,

Na Khumaar Hai, Na Suroor Hai, Na Hi Rang Hai,
Ye Ajeeb Talkh Sharab Hai Meri Zindagi,

Mere Aas Paas To Yaar Dasht Hai Qarb Ka,
Isi Dasht-E-Gam Ka Saraab Hai Meri Zindagi,

Mujhe Dekhti Hui Har Nazar Mein Tarehm Hai,
Koi Chaak Chaak Hijaab Hai Meri Zindagi,

Jahan Surkh WarQ Pukarte Hai Lahoo Lahoo,
Wohi Be-Satar Si Kitaab Hai Meri Zindagi,

Na To Abr Hai, Na Khuda Ka Haath Hai Haath Mein,
Har Roz, Roz-E-Hisaab Hai Meri Zindagi,

Mat Puchh Ke Hai Udaas Kyon Meri Shaayri,
Ek Shaher-E-Dard Ka Baab Hai Meri Zindagi...

No comments:

Popular Posts