Thursday, July 29, 2010

hamaare shauq kii ye intehaa thi


hamaare shauq kii ye intehaa thi
qadam rakhaa ke manzil raastaa thi

bichaR ke Daar se ban-ban phiraa vo
hiran ko apnii kastuurii sazaa thi

kabhii jo Khvaab thaa vo paa liyaa hai
magar jo kho gayii vo chiiz kyaa thi

maiN bachpan meN khilaune toRtaa thaa
mere anjaam kii vo ibtidaa thi

muhabbat mar gayii mujhko bhii Gham hai
mere acche dinoN kii aashnaa thi

jise maiN chhuu luuN vo ho jaaye sonaa
tujhe dekhaa to jaanaa bad-du’aa thi

mariiz-e-Khvaab ko to ab shafaa hai
magar duniyaa baRii kaRvii davaa thi

No comments:

Popular Posts