Na Gawaon Nawak e Neem Kash, Dil e Reza Reza Gunwa Diya
Jo Bachay Hein Sang Samet Lo, Tun e Dag Dag Luta Diya
Mera Charagar Ko Naveed Ho, Saf e Dushmana Ko Khabar Karo
Wo Jo Qarz Rakhtay Thay Jan Per, Wo Hisab Aj Chuka Diya
Karo Kaj Jabeen Pe Sar-e-Kafan, Mere Qatilon Ko Gumaan Na Ho
Ke Ghuroor-e-Ishq Ka Baankpan, Pas-e-Marg Hum Ne Bhula Dia
Udhar Aik Harf Ki Kushtni, Yahan Lakh Uzr Thaa Guftni
Jo Kaha To Sun Ke Ura Dia, Jo Likha To Parh Ke Mita Dia
Jo Rukay To Koh-e-Garaan Thay Hum, Jo Chalay To Jan Se Guzar Gaye
Rah-e-Yaar Hum Ne Qadam Qadam, Tujhay Yadgaar Bana Dia
No comments:
Post a Comment