kaam aa sakiin na apanii vafaayen to kyaa karen
ik bevafaa ko bhuul na jaayen to kyaa karen
mujh ko ye etaraaf duaaon mein hai asar
jaaye na arsh par jo duaayen to kyaa karen
ik din kii baat ho to use bhuul jaayen ham
naazil hon roz dil pe balaayen to kyaa karen
shab bhar to un kii yaad mein taare ginaa kiye
taare-se din ko bhii nazar aayen to kyaa karen
ahad-e-tarab kii yaad mein royaa kiye bahut
ab muskuraa ke bhuul na jaayen to kyaa karen
ab jii mein hai ki un ko bhulaa kar hii dekh len
vo baar baar yaad jo aayen to kyaa karen
tark-e-vafaa bhii jurm-e-muhabbat sahii
milane lagen vafaa kii sazaayen to kyaa karen
No comments:
Post a Comment