Wednesday, May 12, 2010

uzr ane main bhi hai aur bulate bhi nahin

uzr ane main bhi hai aur bulate bhi nahin 
bais-e-tark-e-mulaqat batate bhi nahin 

khub parda hai ke chilman se lage baithe hain 
saf chupate bhi nahin samane ate bhi nahin 

ho chuka qata ta'lluq to jafayen kyon hon 
jinko matlab nahin rahta wo satate bhi nahin 

zist se tang ho ae Dag to jite kyon ho 
jan pyari bhi nahin jan se jate bhi nahin

No comments:

Popular Posts