Wednesday, March 31, 2010

Khud ko paRhtaa huuN, chhoR detaa huuN

Khud ko paRhtaa huuN, chhoR detaa huuN

ek varq roz moR detaa huuN



is qadar zaKhm haiN nigaahon meN

roz ek aaiinaa toR detaa huuN



maiN pujaarii baraste phuuloN ka

chuu ke shaaKhoN ko chhoR detaa huuN



kaasa-e-shab meN Khuun suuraj kaa

qatraa qatraa nichoR detaa huuN



kaaNpte hoNT bhiigtii palkeN

baat adhuurii hii chhoR detaa huuN



ret ke ghar banaa banaa ke “Faysal”

jaane kyuuN Khud hii toR detaa huuN

No comments:

Popular Posts